مقال – أسباب تغير ألوان الأسنان
اللون الطبيعي للأسنان هو الأبيض، بس لما يختلف اللون ده لازم تقلق، الكلام اللي جاي كله عن باقي الألوان اللي ممكن تتلون بيها أسنانك، وسبب وجود كل لون هو ايه…
بس قبل لما نبدأ في الكلام عن اللون اللي المفروض تكون عليه أسنانك، لازم تكون عارف كل حاجه عن تكوين الأسنان علشان تستوعب اللي جاي بسهولة.
تكوين الأسنان:
طبقة المينا:
المينا هي الطبقة الللي ظاهرالنا من السنة، ودورها بيتلخص في كونها خط الدفاع الأول ضد التجاويف اللي ممكن تحصل للأسنان وكمان هي المسؤولة انها تحمي السنة من اي عناصر ممكن تسبب تسوس للأسنان، علشان كده هي السطح الخارجي للسنة، وبتبدأ من خط اللثة لحد آخر السنة، وهي دي اللي بيظهر منها لون السنة.
طبقة العاج:
هي الطبقة اللي خلف طبقة المينا مباشرة، وبتتكون من: 70% من طبقة العاج الموجودة في الأسنان هي عبارة عن 40% من معدن هيدروكسي أباتيت (هو من أهم مصادر قوة العظام)، و20% من المواد العضوية، وال10% مياه، لونها بيكون أقرب للأصفر واللون ده أكيد بيظهر لونه لأن طبقة المينا لونها شفاف.
ودورها الأكبر بيتلخص في حاجتين:
1- طبقة العاج هي السبب الأساسي اننا نعرف نفرق بين الشوربة وبين الآيس كريم، لأن كل التوصيلات الحسية اللي بين الأسنان والأعصاب موجودة في طبقة العاج.
2- بما انها أقوى من طبقة المينا فبالتالي هي الأساس في قوام الأسنان.
مكانها موجود حول طبقة اللب علشان تحميها.
طبقة اللب:
هو عصب الأسنان وفيه حياة السنة يعني لو حصل فيه مشكلة السنة مش هتحس بأي حاجه،
ووظيفته انه ينقل اي اشارات تنبيهية من العاج للدماغ بسبب الأنسجة العصبية الموجودة فيه،
هو الجزء الناعم والرقيق اللي في السنة لأن بوجود الأوعية الدموية والعصبية واللمفاوية جواه بتخليه حساس جداً جداً.
طبقة الملاط:
الطبقة دي تعتبر هي الأسمنت اللي بيقدر يربط الأسنان باللثة وبعظام الفك، والطبقة دي تقدر تصلح نفسها بنفسها، موجودة بين جذر الأسنان واللثة.
الوان الاسنان الغير مرغوب فيها
كده انت بقيت عارف التكوينات الأساسية للأسنان، ودور كل طبقة فيهم، يللا نبدأ في الألوان وهم 3 الوان (الاصفر و البني و الاسود ) هنتكلم عليهم بالتفصيل …
اللون الأصفر:
قبل لما نبدأ كلام عن الأسباب اللي بتخلي لون الأسنان أصفر، لازم نعرف ان طبقة المينا لونها الأصلي هو الأبيض، بس طبقة العاج (الطبقة الثانية) هي اللي لونها أقرب للأصفر، بالتالي الأسباب هتلاقيها مقسومة جزئين ..جزء بيتكلم عن تآكل طبقة المينا وبالتالي يظهر لون طبقة العاج (اللي هو الأصفر)، وجزء عن تصبغ لون طبقة المينا.
أسباب تآكل طبقة المينا:
1. اذا اختارت فرشاة أسنان خشنة هيزيد احتكاك الفرشاة بالأسنان، بالتالي طبقة المينا هتكون ضعيفة
2. الطريقة الصح علشان تغسل أسنانك بالفرشاة من فوق لتحت والعكس، اما طريقة من اليمين للشمال او العكس بتسبب تآكل سريع لطبقة المينا بردو بسبب الاحتكاك الزيادة.
3. لو اتعودت تحلي بعد كل أكلة وكمان قللت من نظافة الأسنان، بكتريا البلاك هتكسر السكر اللي على الأسنان وهتبدأ طبقة المينا تتآكل.
4. كل المشروبات اللي تأثيرها الحمضي عالي زي المشروبات الغازية هي أسرع حاجه تبوظ العظام، وأنواع من اللبان بيكون تأثيره الحمضي عالي ،وبما أن الأسنان أصلها عظم وكمان طبقة المينا هي الطبقة اللي ظاهرة ف التآكل هيبدأ بيها وبعدها يكمل على باقي الطبقات.
5. عضة الفك لو مش مظبوطة هيحصل تآكل سريع لطبقة المينا.
6. بعد عمر طويل ليك و لأسنانك السُمك الخاص بطبقة المينا بيقل بشكل ملحوظ بسبب الحت والتشقق، وتظهر طبقة العاج صاحبة اللون الأصفر.
في كل الحالات اللي فاتت دي بعد تآكل طبقة المينا (اللي لونها الأصلي هو الأبيض) وتظهر طبقة العاج (اللي لونها الأصلي هو الأصفر)
أسباب تصبغ لون طبقة المينا:
1. الأدوية: في كل نوع من الأدوية هتلاقي روشتة في علبته مكتوب فيها الأعراض الجانبية، فيه أنواع من الأدوية من أعراضها الجانبية أنها بتسبب اصفرار لون الأسنان.
2. أنواع الأكل اللي فيها صوص صويا، او كاري، او صوص طماطم بيكونوا السبب في تصبغ طبقة المينا باللون الأصفر.
3. التدخين من أهم الحاجات اللي بتعمل تصبغ للأسنان ويتحول لونها من الأبيض للأصفر ثم البني.
4. المشروبات اللي فيها كافيين زي الشاي و القهوة بيصبغوا الأسنان بالأصفر.
5. غسول الفم على قدر أهميته إلا أن فيه انواع موجود فيها مادة “الكلوروهيسيدين” اللي بتسبب إصفرار الأسنان لو استخدمتها فترة طويلة، و بيكون اللون الأصفر مايل للبني.
اللون البني الداكن:
اللون ده بيظهر في الجزء الداخلي للأسنان قبل ظهور اللون الأسود مباشرة في حالة التسوس.
ايه هو تسوس الأسنان؟
هي أن السنة تظهر فيها ثقوب بعدما طبقة المينا تكون لينة، بعدها لونها الداخلي يتحول للبني الداكن، بعدها للون الأسود، وبعد فترة يبدأ يظهر الم الاسنان.
ازاي بتتم عملية تسوس الأسنان؟
في الأول بيحصل تليين لطبقة المينا، اتليين ده بيكون علامة لتلف البنية الأساسية للأسنان و بتكون ناتجة عن بكتيريا البلاك (وهي عبارة عن طبقة لزجة بتكون موجودة على طبقة المينا بسبب بقايا الطعام) لأن البلاك بتكسر السكر الموجود في طبقة المينا، ولو فضلت الخسارة دي كتير من غير علاج بتبدأ الثقوب تظهر، ولو الثقوب اتسابت من غير علاج هتكبر أكثر لحد لما تدمر كل الأسنان، ولو سبتها أكتر من غير علاج بتنتقل لطبقة العاج…
لما بكتريا البلاك توصل لطبقة “العاج” بتسبب “تجويف الجذر” اللي بسببه بيحصل مشاكل في أعصاب الأسنان، ووقتها ألم الأسنان بيظهر بشكل ملحوظ، من أول الوجع اللي بيظهر وقت الأكل او الشرب لحد الوجع الدائم، لو وصلت لمرحلة الالم بسبب التسوس لازم تزور دكتور أسنان بسرعة.
اللون الأسود:
تعالى نقسم أسبابه لقسمين: الأسباب الخارجية (وهي الأسباب اللي بتخلي طبقة المينا لونها أسود)، والأسباب الداخلية (الأسباب اللي بتخلي اللون الأسود أصله طالع من الطبقات الداخلية للسنة).
الأسباب الخارجية لتصبغ الأسنان باللون الأسود:
● المشروبات اللي لها لون داكن، مثل القهوة و البيبسي
● بعض الأدوية ممكن تؤدي لنفس النتيجة بردو، وخصوصاً الأدوية اللي فيها مكملات الحديد السائل
● التبغ الموجود في السجائر وغيرها
● لما تكون الأسنان متركب فيها تيجان او حشوات (لازم تكون التيجان او الحشوات مصنوعة من كبريتيد الفضة)
دي كانت الأسباب الخارجية اللي ممكن تخلي الأسنان أقرب للون الاسود…
أما الأسباب الداخلية لتغير لون الأسنان للأسود:
● إن الأسنان بدأت تتلف من جوا في حالات زي عدوى اللب والأسنان الميتة.
ملحوظة مهمة جداً:
ظهور اللون الأسود على السنة او الضرس ده مش معناه ان السنة لسه في أول التسوس، اللون الأسود بيظهر لما التسوس يكون تمكن من السنة تماماً لأنه بيبدأ من الداخل للخارج، لحد لما السنة كلها لونها يتحول للأسود (ده طبعا بعد فترة بدون علاج)
في آخر الكلام مهم تعرف ان لو أسنانك لونها بدأ يتغير من لونها الأساسي (الأبيض) لأي لون من اللي اتكلمنا عليهم فوق يبقى لازم تشوف دكتور أسنان ضروري، ولو مفيش أي مشاكل من دي، حاول تلتزم بتنظيف أسنانك بانتظام بالشكل اللي اتكلمنا عنه فوق.
المحتوى ده تم تقديمه بواسطة عيادة White & Bright Dental Center
24 مكرم عبيد، مدينة نصر 01014028671
تقدر تدخل علي صفحتنا علي الفيس بوك لو بتدور علي دكتور أسنان شاطر في مدينة نصر يكون بيقدم خدمات الاسنان الطبيه بجوده عاليه من غير ما تكون الاسعار غاليه
